Zëvendësambasadori i Gjermanisë në Kosovë, Christian Böttcher, është takuar me Komandantin e Forca e Sigurisë së Kosovës, gjenerallejtënant Bashkim Jashari.
Gjatë takimit u diskutua procesi i transformimit të FSK-së dhe perspektiva e saj në të ardhmen, në kuadër të forcimit të kapaciteteve mbrojtëse dhe të sigurisë së Kosovës. Komandanti Jashari shprehu mirënjohjen e tij për mbështetjen e vazhdueshme dhe shumëvjeçare të Gjermanisë në zhvillimin dhe profesionalizimin e FSK-së.
Zëvendësambasadori Böttcher rikonfirmoi se Gjermania do të vazhdojë të qëndrojë përkrah Kosovës, duke theksuar përkushtimin e Berlinit për ta parë Kosovën dhe institucionet e saj të sigurisë si pjesë përbërëse të një arkitekture të përbashkët dhe të integruar evropiane të sigurisë.
Ai po ashtu vlerësoi bashkëpunimin e fortë dhe konstruktiv ndërmjet Gjermanisë dhe Forcës së Sigurisë së Kosovës, duke nënvizuar rëndësinë e këtij partneriteti strategjik për stabilitetin rajonal dhe më gjerë.
Burimi: Ambasada e Gjermanisë / FSK
Discussion about this post