“Deklaratë Publike
Më 19 janar 2018, në ora 11:14, ndodhi një ngjarje që shënjoi jetën time dhe ngriti pikëpyetje të mëdha mbi sigurinë dhe drejtësinë në Kosovë. Në atë ditë, në ambientet e këmbimores “Euro-Këmbimi”, ku isha së bashku me Visar Morinën, disa persona të armatosur rëndë – dy me kallashnikovë dhe dy me revole – kryen një sulm të dhunshëm. Fatmirësisht, Visar Morina nuk pësoi asgjë, por unë, Asllan Asllani, u plagosa rëndë, duke kaluar momente kritike për jetën time.
Edhe pse ka kaluar kaq shumë kohë nga kjo ngjarje, drejtësia ka mbetur në vendnumëro. Një person i dyshuar është arrestuar, mirëpo gjatë vitit 2024 janë mbajtur vetëm dy seanca gjyqësore dhe që atëherë nuk kam asnjë informacion për ecurinë e rastit tim. Kjo zvarritje dhe mosveprim më kanë zhgënjyer jashtëzakonisht shumë, duke minuar çdo besim që kam pasur në sistemin e drejtësisë së Kosovës.
Si viktimë e këtij akti të rëndë, kërkoj me ngulm që drejtësia të vihet në vend. Është e papranueshme që një rast i tillë, që ka vënë në rrezik jetën time dhe sigurinë publike, të mbetet i pazgjidhur dhe i neglizhuar nga institucionet përgjegjëse.
Apeloj te organet e drejtësisë që të veprojnë me urgjencë, të përshpejtojnë procesin dhe të më informojnë për zhvillimet. Drejtësia e vonuar është drejtësi e mohuar, dhe ne si qytetarë meritojmë një sistem ligjor që garanton siguri dhe barazi për të gjithë.”
Me respekt,
Asllan Asllani
Diskutim rreth këtij postimi