Përkujtim për Sali Çekajn – 27-vjetori i rënies heroike
Oso Ferizi në profilin e tij facebok, përkujton bashkëluftarën e tij dhe komandantion Sali Çekaj në përvjetorin e rënies.
“Sot, më 19 prill 2026, përkujtojmë 27-vjetorin e rënies heroike të Sali Çekajt në Luftën e Koshares. Ai mbetet një ndër figurat më të shquara të përpjekjes për liri: intelektual me vizion, organizator i hershëm i rezistencës së armatosur dhe prijës i grupeve të para guerile, luftëtar i vijës së parë kundër Serbisë dhe ndër veprimtarët me angazhimin më të gjatë në luftë, besniku i Presidentit historik Dr. Rugova dhe Ushtrisë së Kosovës.
Sali Çekaj ishte ndër ideatorët e veprimit konkret për çlirim, prijës në thyerjen e kufirit mes shqiptarëve dhe mbështetës i vendosur, bashkë me shokët, në zbatimin e Kushtetutës së Kaçanikut. Veprimtaria e tij u dallua për organizim, vendosmëri dhe përkushtim të palëkundur ndaj atdheut.
I cilësuar me të drejtë si “Maratoni i Lirisë”, ai e nisi herët rrugëtimin e rezistencës dhe e përmbylli në agun e lirisë, duke rënë heroikisht në Koshare. Figura e tij mbetet emblematike dhe e papërsëritshme në historinë tonë kombëtare.
Në këtë përvjetor, nderojmë sakrificën dhe veprën e tij, që vazhdon të mbetet frymëzim për brezat dhe udhërrëfyes drejt lirisë dhe dinjitetit kombëtar.
I paharruar ndër shekuj – Sali Çekaj.”
Oso Ferizi
19.04.2026
Discussion about this post