Në një reagim publik, Kamberi e cilësoi këtë vendim si një hap të rëndësishëm drejt mbështetjes së qëndrueshme dhe në përputhje me standardet evropiane, duke falënderuar institucionet e Kosovës dhe të gjitha grupet parlamentare për unitetin e treguar.
Ai shprehu mirënjohje për Kryetaren e Kuvendit, Kryeministrin dhe subjektet politike parlamentare – Lëvizja Vetëvendosje, Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës – për mbështetjen dhe konsensusin e gjerë politik.
Sipas Kamberit, kjo Rezolutë nuk është vetëm një akt formal, por angazhim konkret për politika më të strukturuara, forcim të përfaqësimit politik, zhvillim socio-ekonomik dhe respektim të plotë të të drejtave të shqiptarëve në Luginë.
Ai theksoi se miratimi unanim është dëshmi se kur ekziston vullnet politik dhe bashkëpunim institucional, mund të ndërtohen politika që i shërbejnë qytetarëve dhe të ardhmes evropiane të rajonit.
Një nga pikat kyçe të Rezolutës, sipas tij, është edhe parimi i reciprocitetit, duke nënvizuar se nuk mund të ketë standarde të dyfishta për komunitetet në rajon.
“Të drejtat që kërkohen për një komunitet duhet të vlejnë njësoj për tjetrin. Ky është parakusht për paqe të qëndrueshme dhe stabilitet rajonal”, theksoi Kamberi.
Ky vendim i Kuvendi i Republikës së Kosovës shihet si mesazh i qartë se çështja e shqiptarëve në Luginën e Preshevës mbetet pjesë e politikës së qëndrueshme shtetërore të Kosovës.
Discussion about this post