Kurti ka thënë se veteranët meritojnë më shumë se vlera që vjen me pagën minimale, por ka shtuar se pikënisje për këtë duhet të jetë e vërteta.
“Unë dëshiroj që të ketë vlerësim më meritor të dinjitetshëm për të gjithë veteranët e luftës së Ushtrisë Çlirimtare të Kosovës dhe ata meritojnë edhe më shumë se sa paga minimale, por ajo nuk mund të jetë pagë sepse paga jepet për punë. Dhe ka shumë veteranë që kanë nevojë për vende pune mirëpo për luftën çlirimtare duhet të ekzistojë një vlerësim meritor edhe material veçse nuk duhet ta mashtrojmë as veten dhe as gjeneratat e ardhshme me numër të fryrë gati në trefishim prandaj është e domosdoshme që njëherë ta kemi pikënisje të vërteten dhe më pastaj ta kemi vlerësimin e duhur. Ne e kemi trashëguar një gjendje kur janë fryrë padrejtësisht, gabimisht dhe dëmshëm listat me veteranët e luftës çlirimtare”, ka thënë Kurti të enjten, pas dorëzimit të disa medaljeve të njësisë speciale të EULEX-it.
Kurti ka thënë se i kupton edhe “ata që janë regjistruar si veteranë kur u është ofruar mundësia pa qenë të tillë e kanë bërë këtë ndoshta edhe nga halli, por rrëfimi për luftën çlirimtare të Kosovës nuk guxon të dëmtohet nëpërmjet listave të fryra”.
Ai është shprehur se është regjistruar si veteran, por ka thënë se nuk ka pranuar ta marrë kompensimin e se s’do ta marrë as në të ardhmen.
Çështja e numrit të veteranëve ka qenë e diskutueshme qe disa vjet. Veteranët marrin pension në vlerën e pagës minimale, ndërsa me ligjin e pagës minimale është paralajmëruar edhe largimi i kriterit që i lidh pensionet e veteranëve me të. Qeveria po e arsyeton propozimin për heqjen e veteranëve nga ndërlidhja duke u bazuar në ligjin e ri që parashihte që kur të bëhet kategorizimi i pensioneve, të hiqej ndërlidhja me pagën. Megjithatë, ligji i parë mbetet në fuqi pasi kategorizimi s’është bërë kurrë.
Aktualisht paga minimale është 130-170 euro. Qeveria synon ta rrisë në mbi 260.
Për dyshimet mbi listat e fryra me rreth 60 mijë veteranët qe nisur një rast gjyqësor ndaj hartuesve të tyre. Gjykata Themelore pati liruar të gjithë të akuzuarit, ndërsa më vonë Gjykata e Apelit gjeti shkelje në vendim dhe e ka kthyer rastin në rigjykim.
Dëmi i pretenduar nga futja në listë e veteranëve që nuk i plotësojnë kriteret pretendohet që është gati 100 milionë euro.
/koha ditore/
Discussion about this post