Në fjalimin para deputetëve të Kuvendit dhe trupit diplomatik, Kurti deklaroi se reforma në drejtësi do të hyjë në fazën vendimtare, ndërsa lufta kundër korrupsionit do të vazhdojë “pa frikë dhe pa favor në çdo cep të republikës”.
“Në këtë mandat, reforma në drejtësi do të hyjë në fazën e saj vendimtare. Do të vazhdojë lufta kundër korrupsionit dhe ligji do të zbatohet pa frikë dhe pa favore gjithandej republikës.”
Zhvillim ekonomik dhe investime mbi 1 miliard euro në vit
Kryeministri theksoi se investimet kapitale do të tejkalojnë 1 miliard euro çdo vit, ndërsa Bruto Produkti Vendor, sipas projeksioneve, pritet të arrijë në 12 miliardë euro gjatë këtij viti. Ai përmendi rritjen e pagës minimale në 500 euro nga 1 korriku, si dhe dyfishimin e shtesave për fëmijë.
Kurti njoftoi gjithashtu për:
- Themelimin e Bankës Zhvillimore,
- 1 miliard euro garanci sovrane për investime në prodhim,
- 500 milionë euro investime për zhvillimin e Brezovicës si destinacion ndërkombëtar turistik,
- Investime strategjike në energji, mbrojtje dhe infrastrukturë.
Qëndrimi për procesin gjyqësor ndaj ish-udhëheqësve të UÇK-së
Në fillim të fjalimit, Kurti u ndal edhe te procesi gjyqësor ndaj ish-udhëheqësve të Ushtrisë Çlirimtare të Kosovës, duke deklaruar se barazimi mes UÇK-së dhe regjimit të Millosheviqit është “shtrembërim faktik dhe historik”.
Sipas tij, krimet kundër njerëzimit në Kosovë janë kryer nga regjimi i atëhershëm i Jugosllavisë së Serbisë, nën udhëheqjen e Slobodan Millosheviqit.
Forcim i mbrojtjes dhe aleancave ndërkombëtare
Kryeministri paralajmëroi investime prej 1 miliard euro në mbrojtje, rritje të kapaciteteve të Forcës së Sigurisë së Kosovës dhe prodhimin e dronëve luftarakë “Made in Kosova”.
Ai ritheksoi përkushtimin ndaj aleancës me Bashkimin Evropian, Shtetet e Bashkuara të Amerikës, NATO-n dhe vendet partnere.
Kabineti i ri qeveritar
Në fund të fjalimit, Kurti prezantoi përbërjen e kabinetit të ri qeveritar, me ministra dhe zëvendëskryeministra që do të udhëheqin dikasteret kryesore në mandatin e ardhshëm.
“Mandati i ri do të jetë mandat i punës, drejtësisë dhe dinjitetit për secilin, i sigurisë dhe begatisë për të gjithë.”
Discussion about this post