Sot qenkan bërë 16 vite nga vdekja e Jashar Salihut. Për herë të parë dhe të vetme Jasharin e kam takuar në Londër gjatë verës së vitit 1998 kur erdhi nga Zvicra për ta popullarizuar kauzën e UÇK-së dhe fondin ‘Vendlindja Thërret’. E mbajti një fjalim mjaft të mirë.
Unë dhe Tim Judah e intervistuam pas fjalimit. Fliste prajshëm dhe nxirrte fjalë me kujdes. E emëruam: ‘Revolucionari i Qetë’. Unë kurrë më nuk e takova. Por, pas disa muajsh, Tim Judah e takoi sërish por kësaj radhe diku në malet e Shqipërisë dhe Kosovës kur lufta ishte në vlugun më të madh dhe kur Jashar Salihu ishte me uniformë dhe pushkë në krah.
Nga ky takim Tim Judah bëri një reportazh të gjatë për ushtarët që luftonin dhe për ata që pritnin matanë kufirit për të hyrë në luftë. Reportazhi u botua si kryetemë në disa faqe në shtesën e gazetës së njohur ‘The Guardian’ me titull: ‘The Virgin Soldiers’ (Ushtarët e Virgjër). Në faqe të parë të gazetës u botua kjo fotografi që shihet në këtë postim dhe të cilën e ka bërë fotoreporteri i njohur britanik Seamus Murphy. Shkrimi dhe kjo fotografi kanë krijuar jehonë të madhe pozitive për luftën e UÇK-së në mesin e britanikëve. Kjo fotografi domethënëse gjatë luftës ka qarkulluar shpesh në mediat britanike dhe ka krijuar efekt të duhur.
Edhe te ne në Kosovë kjo fotografi është e njohur por nuk është bërë amblemë për të simbolizuar ushtarin e UÇK-së siq do të duhej të ishte.
Sidoqoftë, luftëtarët e lirisë nuk duhet të harrohen.
Diskutim rreth këtij postimi