Banka Botërore do t’i ndihmojë bizneset në Kosovë me mbi 10 milionë dollarë apo rreth 8 milionë e 463 mijë euro për rimëkëmbje ekonomike, në luftën me pandeminë Covid-19, shkruan Gazeta Metro.

Zëvendësuesja e Sekretares së Përgjithshme, Gentiana Islamaj sot gjatë një takimi virtual me përfaqësues të lartë të Bankës Botërore ka diskutuar për  ecurinë e projektit “Konkurrueshmëria dhe gatishmëria për eksport”.

Gjatë takimit u theksua rëndësia e këtij projekti për përkrahje për bizneset kosovare dhe që përmes një vlere me mbi 10 milionë dollarë do t’u shpërndahen bizneseve në formë të granteve brenda dy vitesh. Kjo përkrahje do t’i ndihmojë bizneset vendore për rimëkëmbje pas dëmeve të shkaktuara nga pandemia COVID-19.

Znj. Islamaj njoftoi përfaqësuesit e Bankës Botërore për aktivitetet dhe iniciativat të cilat i ka ndërmarrë Ministria e Tregtisë dhe Industrisë për t’i dalë në ndihmë sektorit privat, me fokus të veçantë ndryshimet legjislative dhe shpërndarja e granteve për biznese të ndryshme dhe bizneset të cilat janë në pronësi të grave.

Përfaqësuesit e Bankës Botërore theksuan bashkëpunimin e shkëlqyeshëm që kanë me Ministrinë e Tregtisë dhe Industrisë dhe ofruan mbështetjen e tyre në zbatimin e këtij projekti, i cili do të ndihmojë bizneset vendore të rikuperohen nga pandemia Covid-19./gazetametro.net