Kanë kaluar pak më shumë se një vit nga data 6 Maj 2022 kur i kisha dërguar letër Sekretarit të Shtetit të SHBA-ve, z. Antony Blinken, përmes së cilës kisha kërkuar që Aleksandar Vulin të futej në ‘listën e zezë,’ duke argumentuar me fakte se ai ishte person që kjartazi i plotësonte kushtet e seksionit 1(a) të Urdhërit Ekzekutiv Presidencial 10433 të nënshkruar nga Presidenti Biden më 8 Qershor 2021, për Bllokimin e Pasurisë dhe Ndalimin e Hyrjes në SHBA të Personave që i Kontribuojnë Destabilizimit të Situatës në Ballkanin Perëndimor.
Me 12 Maj 2022, kisha pranuar përgjigje nga zyra e Sekretarit Blinken për letrën time.
Sot, SHBA-të e paskan futur në listë të zezë Aleksandar Vulinin. Vendim i duhur, dhe jashtëzakonisht i mirëpritur!
Në letrën time argumentuese për futjen e Vulinit në listen e zezë të SHBA-ve, ndër të tjera, kisha potencuar se “regjimi i Vuçiqit në Serbi është thuajase kopje e atij të Milosheviqit, pos që ky i tanishmi është më pak i ekspozuar dhe më i sofistikuar ngase vepron nën vellon e demokracisë.”
Tutje, kam elaboruar se si Vulin është adhurues i zjarrtë i Milosheviqit dhe vazhdon të përpiqet të jetësojë idetë e tij përfshirë atë të “botës serbe,” duke mohuar në vazhdimësi krimet paraprake e duke glorifikuar “kasapin e Ballkanit.”
“Urrejtja e Vulinit për shqiptarët nuk ka fund, anipse koha e luftrave brutale të Milosheviqit në Ballkan ka përfunduar me intervenimin e NATO-s në Kosovë më 1999. Në fund të vitit 2020, Vulin kishte institucionalizuar termin denigrues “shiptari” si Minister i Mbrojtjes, term ky që shpërfaqë ndjenjen serbe se shqiptarët janë popull inferior dhe të prapambetur,” thuhet në letër.
“Qeveria e Serbisë nën Vuçiqin gjithëherë veç ka pretenduar të jetë në linjë me interesat Evropiane dhe Amerikane. Realisht, Serbia historikisht ka qenë dhe mbetet lojale ndaj Rusisë,” kam shkruar në letër.
Vulin ishte dhe mbetet zyrtar i korruptuar,, gjë të cilën po ashtu e kam potencuar në letrën time.
“Nën driten e këtyre argumenteve dhe fakteve,” si dhe bazuar në “veprimet dhe fjalët e Vulinit, shihet kjartazi se ai përfaqëson një kërcënim serioz për destabilizimin e rajonit dhe kundër vlerave Evropiane dhe Amerikane të cilat disa nga vendet tjera në rajon, siç është Kosova, i përqafojnë pa hezitim,” kisha përfunduar letrën duke specifikuar kriteret që Vulin përmbushte për t’u futur në listen e zezë të SHBA-ve.
Përjetësisht mirënjohës SHBA-ve për vendosshmërinë e tyre për të sjellë paqe e prosperitet në Ballkan, e veçanërisht për të ruajtur e përkrahur Republikën e Kosovës, si projektin më të suksesshëm të shtetndërtimit nën ombrellën e SHBA-ve.”
Diskutim rreth këtij postimi