Ushtruesja e detyrës së Kryetares dhe Kryetarja e Kuvendit të Kosovës, Albulena Haxhiu, ka reaguar pas publikimit të vërejtjeve përfundimtare të Komitetit të OKB-së për Eliminimin e Diskriminimit Racor (CERD) ndaj Serbisë, duke theksuar se gjetjet e këtij mekanizmi ndërkombëtar konfirmojnë shqetësimet që shqiptarët e Lugina e Preshevës i kanë ngritur prej vitesh.
Sipas saj, praktika e pasivizimit të adresave ndaj shqiptarëve në Preshevë, Bujanoc dhe Medvegjë përbën një formë diskriminimi institucional që cenon drejtpërdrejt praninë juridike të qytetarëve shqiptarë.
Ajo rikujtoi se Kuvendi i Republikës së Kosovës, përmes rezolutës së miratuar më 24 prill 2026 për avancimin e përkujdesjes institucionale ndaj shqiptarëve në Luginë, e ka trajtuar këtë çështje si përgjegjësi shtetërore.
“Tani, pas gjetjeve të CERD-it, kjo përgjegjësi ka edhe një adresë të qartë ndërkombëtare”, ka theksuar Haxhiu.
Në reagimin e saj, ajo ka nënvizuar se pasivizimi i adresave nuk është vetëm çështje administrative, por një mekanizëm që prek të drejtat themelore të qytetarëve, duke ua mohuar dokumentet personale, qasjen në shërbime dhe sigurinë para ligjit.
Ajo u bëri thirrje partnerëve ndërkombëtarë, mekanizmave të OKB-së, Bashkimi Evropian, OSBE dhe Këshilli i Evropës që këtë çështje ta trajtojnë me prioritet dhe të kërkojnë nga Serbia zbatimin e plotë të rekomandimeve të CERD-it.
Sipas saj, të drejtat e shqiptarëve në Luginën e Preshevës nuk mund të mbeten në margjinat e raporteve ndërkombëtare, por duhet të jenë pjesë e qartë e dialogut politik, e monitorimit ndërkombëtar dhe e çdo procesi ku matet sundimi i ligjit dhe trajtimi i pakicave.
Ky reagim vjen në një kohë kur çështja e pasivizimit të adresave po konsiderohet gjithnjë e më shumë si një nga format më të rënda të diskriminimit administrativ ndaj shqiptarëve në jug të Serbisë, me pasoja direkte në përfaqësimin politik, të drejtat civile dhe qëndrueshmërinë demografike të shqiptarëve në rajon.
Discussion about this post