Në një deklaratë publike drejtuar institucioneve të Kosovës, pjesëtarë të dy grupeve të para guerile të vitit 1991 – të njohura si grupet e para të organizimit të armatosur për çlirimin e Kosovës – kanë shprehur pakënaqësitë e tyre për, sipas tyre, neglizhimin e kontributit historik që kanë dhënë. Reagimi vjen në kohën kur debati mbi rolin e themeluesve të UÇK-së, sakrificën e heronjve dhe interpretimet politike të historisë është intensifikuar në sferën publike.
Pjesëtarët e këtyre grupeve pretendojnë se institucionet shtetërore po e përdorin historinë si simbolikë politike, ndërsa aktorët realë të organizimit të hershëm të rezistencës së armatosur po anashkalohen për më shumë se tri dekada.
REAGIM PUBLIK
DY GRUPET E PARA GUERILE 1991: “Sakrifica jonë po injorohet, ndërsa historia po përdoret si dekor politik!”
Presidentja e Kosovës, znj. Osmani, e ka marrë kërkesën tonë zyrtare – nga ne, pjesëtarët e dy grupeve të para guerile të vitit 1991 në Shqipëri (Mali i Dajtit – Surrel), të cilët vepruam me marrëveshje dhe pajtim nga Presidenti historik Dr. Ibrahim Rugova dhe Shtetin Shqiptar në krye më Presidentin R. Alia.
Këto dy grupe kanë qenë bërthama e parë e organizuar e UÇK-së, shumë përpara shpërthimit të luftës së armatosur.
Brenda këtyre grupeve ishin heronjtë dhe themeluesit e vërtetë të UÇK-së:
Sali Çekaj, Adem Jashari, Zahir Pajaziti, Ahmet Hoxha, Ilaz Kodra, Xhevat Qerimi, dhe shumë të tjerë që u bënë shtylla historike e rezistencës.
Me 02.12.1991, të prirë nga hero Sali Çekaj, 33-veta kaluam kufirin më armatime dhe nisëm fazën e parë të angazhimit të armatosur për lirinë e Kosovës.
Megjithatë, për 33 vite, asnjë institucion nuk na ka dhënë as falënderimin më minimal.
Kjo situatë është padrejtësi dhe absurd i pastër: në njërën anë institucionet krenohen me UÇK-në, përdorin emrat e heronjve për ceremoni dhe politikë ditore, ndërsa në anën tjetër injorojnë themeluesit e saj dhe sakrificën tonë të drejtpërdrejtë.
Ndërkohë, sot nderohet një këngëtare si Adelina Ismajli që e kthen këtë çështje në biznes – ndërsa ata që ngritën themelet e UÇK-së vazhdojnë të anashkalohen, po të ishin gjallë ata heronjë njejtë do trajtoheshin.
Kjo është tallje, bigjoz politik dhe mohim i kontributit tonë historik.
Ne kërkojmë që institucionet e Republikës së Kosovës të kthehen nga historia e vërtetë, të respektojnë sakrificën e gjeneratës së parë të rezistencës dhe të mos lejojnë që themeli i shtetit të nëpërkëmbet.
Me respekt,
Oso Ferizi – pjesëtar i grupit të armatosur të 02.12.1991
Në emër të pjesëtarëve të dy grupeve të para guerile, 1991.
28.11.2025.
Ky reagim i drejtuar institucioneve të Kosovës hap një debat të ri për mënyrën se si trajtohet narrativa historike e viteve ’90 dhe roli i atyre që vepruan para shpërthimit të luftës. Mesazhi përmbyllës i pjesëtarëve të grupeve guerile kërkon rivlerësim të kontributit, respekt institucional dhe kthim tek rrënjët e vërteta të rezistencës, duke paralajmëruar se heshtja dhe harresa nuk mund të jenë pjesë e historisë zyrtare.
Discussion about this post