Gjilan, 10 nëntor 2025 — Autor: Ismet Azizi

Ministria e Kulturës, Rinisë dhe Sportit e Republikës së Kosovës, përmes Qendrës Rajonale për Trashëgimi Kulturore në Gjilan, ka marrë vendim për ruajtjen dhe restaurimin e Shkollës së Vjetër “Liria” në fshatin Kokaj, duke e shpallur atë pasuri të trashëgimisë kulturore të mbrojtur.

Sipas dokumentit zyrtar të MKRS-së me referencë nr. 474/2025, projekti i restaurimit është pjesë e programit “Ndërhyrje konservuese dhe restauruese në Rajonin e Gjilanit – Faza e parë (LOT III)”, me numër identifikues 207-25-8069-5-1-1, dhe pritet të fillojë zyrtarisht më 12 nëntor 2025.

Ky vendim përfshin ndërhyrje konservuese dhe restauruese në strukturën e objektit historik, i cili ka shërbyer si qendër e arsimit shqip në Kokaj që nga periudha e pasluftës së dytë botërore. Për shumë breza, kjo shkollë ka qenë vend i dijes, i kujtimeve të fëmijërisë dhe simbol i përpjekjeve për arsimim në kushte të vështira.

Në njoftim theksohet se restaurimi do të bëhet në përputhje me Ligjin për Trashëgimi Kulturore (Nr. 02/L-88) dhe me standardet profesionale të mbrojtjes së trashëgimisë arkitekturore, nën mbikëqyrjen e Qendrës Rajonale për Trashëgimi Kulturore – Gjilan dhe në bashkëpunim me Drejtorinë për Trashëgimi Kulturore të MKRS-së.

Kryetari i Qendrës Rajonale për Trashëgimi Kulturore në Gjilan, z. Arton Hoxha, përmes kësaj shkrese, falënderon të gjithë bashkëpunëtorët dhe komunitetin lokal për kontributin në ruajtjen e vlerave kulturore të rajonit.

Kokaj, një fshat me histori dhe arsim të hershëm, tashmë ka një tjetër arsye për krenari. Me këtë vendim, objekti i shkollës së vjetër “Liria” do të ruhet si dëshmi e identitetit, arsimit dhe përkushtimit qytetar në mbrojtjen e trashëgimisë kombëtare.