ALI FAZLI PREKAZI TË SHPALLET “HERO I KOSOVËS”!

Një komb që harron ata që dhanë gjithçka për të, humb vetveten.

Në zemrën e Drenicës, në kohët më të errëta të historisë shqiptare, lindi dhe veproi një ndër figurat më të ndritura të qëndresës kombëtare: Ali Fazli Prekazi. Sot, më shumë se kurrë, Kosova ka detyrim moral dhe kombëtar të nderojë këtë burrë të madh që jetoi për ideal, luftoi për atdhe dhe sakrifikoi gjithçka – pa kërkuar asgjë në këmbim.

Kush ishte Ali Fazlia?

– Komandant i spikatur gjatë viteve 1943–1945, bashkëluftëtar i Mehmet Gradicës, Shaban Polluzhës, dhe pjesë e strukturave të organizimit të rezistencës shqiptare me Xhafer Devën, Rexhep Mitrovicën dhe Bedri Pejanin.

– Luftëtar i vendosur kundër përpjekjeve për mobilizimin e shqiptarëve në frontet komuniste të ish-Jugosllavisë.

Guximi i tij legjendar: Gjatë viteve 1944, me disa shokë të besuar, shkoi te burgu i Mitrovicës, ku mbaheshin të burgosur shqiptarë që refuzonin mobilizimin për llogari të komunizmit. Rezultati? 300 shqiptarë u liruan dhe shumë prej tyre iu bashkuan çetës së tij në luftën për mbrojtjen e Drenicës dhe Sanxhakut. Kjo ngjarje historike dëshmohet nga të mbijetuar që kanë folur në dokumentarët për figurën e tij.

Një familje e tërë në shërbim të lirisë

– Pas luftës, Ali Fazlia jetoi në ilegalitet për tre- vite, derisa u detyrua të dorëzohej për të shpëtuar jetën e 25 familjarëve që u morën peng nga regjimi serb.

– As burgjet, as torturat nuk ia përkulën shpirtin.

– Djali i tij Shaqë Fazlia u plagos në luftën e UÇK-së, nipi Muhamet Fazlia ra dëshmor, e trupi i tij u përdor nga forcat serbe për të terrorizuar popullin.

– Kushëriri i tij Musli Fazlia dha jetën për liri.

Pse sot? Pse tani?

Sepse Kosova nuk mund të ndërtojë të ardhmen duke harruar themelet e saj.

Ali Fazlia nuk u rreshtua pas asnjë partie, dhe pikërisht për këtë, nuk e gëzon sot nderimin që meriton.

Por Kosova nuk do të ishte sot shtet, nëse nuk do të kishte pasur burra si ai.

Heshtja institucionale është padrejtësi historike.

KËRKOJMË ME ZË TË LARTË:

Që më 28 Nëntor 2025, në Ditën e Flamurit, Ali Fazli Prekazi – Flamurtari i Drenicës – të shpallet “Hero i Kosovës”!

Kjo nuk është një kërkesë për një dekoratë, por një borxh që kombi i ka këtij njeriu që jetoi për të tjerët.

Thirrje për:

Institucionet e Kosovës, Presidenten, Kuvendin, Kryeministrin

Historianët, studiuesit dhe intelektualët

Mediat dhe artistët e kombit

Mos e lini në harresë këtë emblemë të qëndresës kombëtare. Ai nuk jetoi për tituj, por sot është detyrimi ynë t’ia japim.

Ali Fazli Prekazi nuk ishte i një partie – ishte i Kombit.

Ngrihuni për Flamurtarin!

Me nderim dhe përgjegjësi historike,”

Osman Ferizi

Njohës dhe hulumtues i veprimtarisë së Ali Fazlisë

Zëri i një amaneti që nuk shuhet

20 Qershor 2025.

——————————-

Dy fjalë për Osman Ferizin:

Osman Ferizi është një nga personalitetet më të angazhuara të çështjes kombëtare shqiptare, me veprimtari të shquar në dy etapa kyçe: në luftën çlirimtare të Kosovës dhe në diasporë pas përfundimit të saj. Ai është nga fshati Kodrali i Deçanit, dhe ndër të parët që iu bashkua grupit gueril të dhjetorit 1991, të organizuar nga Sali Çekaj, i cili u stërvit në Shqipëri bashkë me figura si Adem Jashari e Zahir Pajaziti – duke shënuar fillesat e Ushtrisë Çlirimtare të Kosovës (UÇK).

Në vitet 1991–1996 mori pjesë në aksione të ndryshme guerile në Dukagjin, Llap e Deçan, dhe familja e tij ishte objekt represioni nga forcat serbe. Më vonë, ai u përfshi në luftimet e drejtpërdrejta në kuadër të UÇK-së, duke kontribuar në frontin e Kosharës dhe zona të tjera strategjike. Osman Ferizi është ndër zërat e rrallë që publikisht ka dëshmuar për fazat e para të organizimit të UÇK-së dhe ka denoncuar përpjekjet për t’i zhveshur nga meritat luftëtarët e brezit të parë.

Pas luftës, ai u vendos në Gjermani, ku vazhdoi aktivitetin në shërbim të kombit. Ka qenë kryetar i degës së LDK-së në Gjermani dhe kryetar i shoqatës kulturore “Sali Çekaj” në Pfaffenhofen, duke mbledhje të fondeve pët t’i përkrahur shoqatat patriotike në Kosovë, duke   organizuar aktivitete humanitare,  kulturore dhe arsimore për diasporën shqiptare. Është vlerësuar me mirënjohje nga autoritetet gjermane për kontributin e tij të vazhdueshëm. Po ashtu, është një kritik i hapur ndaj drejtuesve të partive në vend dhe përkrahës i drejtësisë për të gjitha viktimat e luftës, pa dallime politike.

Në thelb, Osman Ferizi mishëron figurën e luftëtarit të bindur dhe të aktivistit të paepur në shërbim të çështjes kombëtare, i cili ka qenë aktiv në armë dhe në fjalë, në atdhe dhe në mërgatë.

dardaniapress.net