Novi Pazar, 18 qershor 2025 – Një reagim i fuqishëm i deputetit dhe zyrtarit të SPP-së, Edin Numanoviq, ka rikthyer në vëmendje tensionet e vjetra rreth përfshirjes së politikës në Bashkësinë Islame të Sanxhakut. Ai akuzoi drejtpërdrejt struktura politike për tentativë të, siç tha, “okupimit politik të institucioneve fetare”, me theks të veçantë në Mešihatin e Bashkësisë Islame, të themeluar nga i ndjeri muftiu Muamer Zukorlić.
Në një deklaratë të publikuar në rrjetet sociale, Numanoviq paralajmëroi se “nuk do të lejohet që Bashkësia Islame të bëhet plaçkë politike e kriminelëve dhe tradhtarëve”, duke akuzuar partitë rivale – veçanërisht SDP-në – për ndërhyrje në aktivitetet fetare.
Shkas për këtë reagim u bë pjesëmarrja e ish-kryetarit të Novi Pazarit dhe zyrtarit të SDP-së, Nihat Biševac, në ceremoninë e hapjes së një xhamie në lagjen Bajeviq. Ngjarja ishte nën përkujdesjen e Mešihatit, dhe pranimi i një figurë të tillë në një manifestim fetar u interpretua si devijim nga linja e trashëguar e muftisë Zukorlić, i cili në të kaluarën kishte kritikuar ashpër Biševacin dhe strukturat që ai përfaqësonte.
Numanoviq thekson se vlerat e pavarësisë dhe neutralitetit të Bashkësisë Islame janë vënë në rrezik dhe ka kërkuar nga besimtarët të reagojnë kundër, siç e quajti ai, “instrumentalizimit politik të xhamive”.
Ky zhvillim ka ringjallur debatin për rolin e feve në jetën publike dhe për kufijtë mes autonomisë fetare dhe ndikimit politik në Sanxhak. Nga njëra anë qëndron pretendimi për ruajtjen e traditës së pavarësisë që e ka karakterizuar Bashkësinë Islame në kohën e Muftisë Zukorlić, ndërsa nga ana tjetër, duket se po ndërtohen ura të reja të bashkëpunimit, ndoshta jo pa kundërshti.
/dardania press/
Diskutim rreth këtij postimi