Në Prishtinë u shënua 145-vjetori i Betejës së Nokshiqit, e 4 dhjetorit 1879, dhe të betejave të janarit 1880 të luftëtarëve të Lidhjes Shqiptare të Prizrenit dhe të mbrojtjes së tyre heroike të Plavës e të Gucisë nga pushtimi i Malit të Zi. Ora përkujtimore me drejtuesin Florent Zeqaj u mbajt në hotel “Emerald”, më 18 shkurt 2025. Në praninë e afër shtatëqind pjesëmarrësve, fjalën e hapjes e mbajti Zekë Nokshiqi, nismëtar, veprimtar dhe biznesmen i njohur në Teksas. Zymer U. Neziri paraqiti një referat në këtë orë përkujtimore për Plavën e Gucinë dhe betejat mbrojtëse në vitet 1879-1880. Në vijim, pasuan përshëndetjet e disa personaliteteve të njohura: Fatmir Sejdiu, president i përparshëm i Republikës së Kosovës, akad. prof. dr. Muhamet Mala, gjenerali i Betejës së Koshares, Rrustem Berisha, komandanti i brigadës 136 “Rugova”, Salih B. Lajçi, kryetari i Komunës së Prishtinës, Përparim Rama, Binak Ulaj, veteran i Lëvizjes Kombëtare, Flamur Gashi, veprimtar, diplomat e ambasador, Ramë Sinanaj, veprimtar nga Plava. Fjalën e mbylljes e mbajti Ramiz Tafilaj, veprimtar dhe biznesmen i njohur në Teksas.
Pjesëmarrësit e kësaj ore përkujtimore ishin edhe nga Ulqini, Shkodra, Lezha, Tirana, Lushnja, Kërçova, Kumanova, Medvegja, Bujanoci, Presheva, kurse shumica ishin nga Plava e Gucia, Tregovishta (Rozhaja), Malësia e Gjakovës dhe Rugova, si dhe nga viset e ndryshme të Kosovës.
Pjesa e dytë e programit ishte paraqitja artistike e grupit të valleve “Dardania”, Tropojë, drejtuar nga Shpresart Memia, si dhe e ansamblit folklorik autokton “Rugova”, Shtupeq, drejtuar nga Vesel Nikçi. Me lahutë këndoi lahutari Hysen Kurtaj.
Presidentja e Republikës së Kosovës, sipas hartuesit të propozimit, Zymer U. Neziri, dhe të përkrahjes nga tridhjetë intelektualë të dalluar të institucioneve të larta arsimore e të dy akademive të shkencave e të arteve, si dhe prej shtatë shoqatave nga Evropa e Amerika, më 18 shkurt 2025 i dekoroi luftëtarët e Betejës së Nokshiqit, të dhjetorit 1879, dhe të betejave të janarit 1880, me Urdhrin “Hasan Prishtina”.
(Këshilli Organizues: Zymer Ujkan Neziri, Zekë Nokshiqi, Ramiz Tafilaj, Bruno Selimaj, Florent Zeqaj, Binak Ulaj)
Diskutim rreth këtij postimi