Në Washington DC është shkruar sot një faqe e re për të drejtat e shqiptarëve në Luginë të Preshevës. Falë angazhimit të vazhdueshëm të komunitetit shqiptar në SHBA dhe diplomatëve miq, çështja e diskriminimit shtetëror ndaj shqiptarëve atje u ngrit për herë të parë në mënyrë të drejtpërdrejtë në një dëgjim zyrtar të Kongresit Amerikan.
Në Nënkomitetin për Evropë të Komitetit për Punë të Jashtme, Kryetari i këtij nënkomiteti, Kongresisti Self, e shndërroi çështjen e Luginës së Preshevës në pjesë të politikës së jashtme të SHBA-ve. Ai deklaroi se pasivizimi i adresave dhe diskriminimi sistematik i shqiptarëve etnikë nga institucionet e Serbisë është plotësisht i patolerueshëm, duke paralajmëruar se këto praktika mund të rihapin konfliktet e brishta në Ballkan, sidomos në kontekstin e qasjes agresive të Serbisë ndaj Kosovës.
Shkruan Faton Bislimi në facebok
“Edhe një lajm historik e fantastik nga dëgjimi kongresional në Komitetin për Punë të Jashtme që ende po vazhdon në Capitol Hill!
Sot u shkrua HISTORI për Luginën e Preshevës — në zemër të Kongresit Amerikan.
Kongresisti Self: “”Sot po e prezantoj edhe një rezolutë për shqiptarët në Luginë të Preshevës. Ka ardhë koha që Serbia të mbahet përgjegjëse për diskriminimin etnik ndaj tyre…”
Për mbi dy dekada kam pasur nderin të jem i angazhuar në Washington, DC për të drejtat e shqiptarëve të Luginës së Preshevës. Sot, në dëgjimin për Ballkanin Perëndimor në Komitetin për Punë të Jashtme të Kongresit, respektivisht në Nëkomitetin për Evropë, ndodhi diçka që deri dje dukej e pamundur:
Miku ynë, kongresisti Keith Self, Kryetar i Nënkomitetit për Evropë, prezantoi REZOLUTËN e parë në historinë e Kongresit Amerikan për çështjen e Luginës së Preshevës.
Po, e lexuat mirë: HERA E PARË NË HISTORI.
Kjo rezolutë kërkon nga Departamenti i Shtetit të përgatisë dhe të paraqesë një raport zyrtar mbi diskriminimin e shqiptarëve në Luginë nga Beogradi — përfshirë:
• pasivizimin e adresave, të cilin Kongresi e quan hapur “spastrim etnik me mjete administrative”
• mosnjohjen e diplomave
• mungesën e përfaqësimit proporcional në institucionet shtetërore
• dhe praktika të tjera diskriminuese, të faktuara e të dokumentuara prej vitesh
Kongresi Amerikan, sot, i dha zë të fuqishëm Luginës.
Për mua personalisht — pas gjithë viteve punë, lobim, takime, raporte, shkresa, dhe angazhim të palodhur — kjo është një ditë që s’e harroj kurrë.
Çfarë nderi… Çfarë krenarie… Çfarë shpërblimi për gjithë atë angazhim… dhe çfarë motivimi për të vazhduar edhe më fuqishëm!
Ky është një mesazh i qartë: Lugina e Preshevës NUK është e harruar. Të drejtat e shqiptarëve NUK mund të shkelën pafund. Dhe zëri ynë, kur është i bashkuar, dëgjohet deri në Kongresin e Shteteve të Bashkuara.
Sot u hap një kapitull i ri. Sot i treguam botës se drejtësia vonon, por kur vjen… vjen me ZË TË MADH.
Mirënjohje e përzemërtë dhe e përjetëshme për Komunitetin Shqiptaro-Amerikan në Dallas, veçanërisht per z. Gino Mulliqi dhe miqët e bashkëpatriorët tjerë që e bënë të mundur këtë ngjarje historike, dhe takimin tonë me Kryetarin Self në Dallas në Tetor 2025.
Vazhdojmë përpara — më të fortë se kurrë!!
Kjo ndërhyrje zyrtare në Kongresin Amerikan shënon një kthesë të rëndësishme për Luginën e Preshevës, duke e futur problemin e pasivizimit dhe diskriminimit në vëmendjen e politikës së jashtme të SHBA-ve. Nisma pritet të hapë rrugë për veprime të reja diplomatike dhe presion ndërkombëtar ndaj Beogradit. Mbetet tash detyrë e institucioneve shqiptare dhe faktorëve politikë e shoqërorë që ta shfrytëzojnë këtë momentum historik.
dardaniaress
Discussion about this post