“Kam nderin dhe kënaqësinë t’ju njoftoj se, pas një procesi rigoroz disamujor, babai im është përzgjedhur anëtar i Akademisë Evropiane të Shkencave, Humanistikës dhe Letërsisë (Academia Europaea), duke u nderuar me titullin e merituar “Akademik”.
E themeluar në vitin 1988, me seli në Londër, kjo Akademi është një institucion i shquar evropian që bashkon studiues e shkencëtarë nga 23 fusha të ndryshme – nga shkencat humane e letërsia, deri te shkencat natyrore dhe teknologjia.
Anëtarët e saj janë personalitete të dalluara nga bota akademike, të cilët kontribuojnë në avancimin e dijes, edukimit dhe kërkimit shkencor. Aktualisht, Academia Europaea numëron mbi 7,000 anëtarë, përfshirë 88 fitues të Çmimit Nobel. Ajo luan gjithashtu një rol strategjik në këshillimin e vendimmarrësve evropianë në fushat e shkencës, arsimit dhe inovacionit, duke ndikuar në të ardhmen e hulumtimit shkencor në Evropë.
Është kënaqësi e veçantë që babai im është anëtari i parë shqiptar i Kosovës në këtë Akademi dhe i pari që përfaqëson fushën e folklorit dhe të etnologjisë nga anëtarët e pranuar sivjet.
Nëna, unë, Kreshniku dhe Batoni jemi jashtëzakonisht krenarë për këtë arritje të jashtëzakonshme – jo vetëm për të, por edhe për faktin se thesari shpirtëror i trashëgimisë shqiptare do të zërë një vend të merituar në hapësirën evropiane të dijes, duke u ruajtur, vlerësuar dhe mbështetur përtej kufijve tanë.”
Discussion about this post