Në një përgjigje dhënë gazetës Bota sot, Ministria e Drejtësisë, e cila menaxhon fondin shtetëror për të akuzuarit nga Dhomat e Specializuara, zbuloi se deri më tani janë shpenzuar mbi 32 milionë euro për mbrojtjen e të akuzuarve nga Gjykata Speciale. Që nga 5 nëntori i vitit 2020, Hashim Thaçi, ish-president i Kosovës, Kadri Veseli, ish-kryetar i PDK-së, Rexhep Selimi, ish-shef i Grupit Parlamentar të Vetëvendosjes, dhe Jakup Krasniqi, ish-kryetar i Kuvendit, po akuzohen nga Gjykata Speciale edhe për vrasjen e kundërshtarëve politikë, anëtarë të Lidhjes Demokratike të Kosovës dhe përkrahës të presidentit historik, Ibrahim Rugova.
E ndaj këtij lajmi ka reaguar ashpër Osman Ferizi, ish-kryetar i Degës së LDK-së dhe Shoqatës Kulturore “Sali Çekaj” në Gjermani, ai dhe njëri nga pjesëtarët e grupit të armatosur të dhjetorit 1991.
Sipas tij, 32 milionë euro për të akuzuarit në Hagë nuk është drejtësi, por është tradhti e amanetit të luftës.
“Me indinjatë të thellë e mora lajmin se Ministria e Drejtësisë ka konfirmuar zyrtarisht se janë shpenzuar mbi 32 milionë euro nga buxheti i shtetit për mbrojtjen juridike të të akuzuarve në Hagë. Këta persona nuk janë në Hagë për të mbrojtur luftën e UÇK-së, por për të dhënë llogari për vrasje politike të shqiptarëve, për eliminim të veprimtarëve të LDK-së dhe shkatërrim të parimeve mbi të cilat u ngrit liria. Dhe për këtë, shteti nuk ka asnjë arsye t’i mbrojë, e aq më pak t’i financojë! A është kjo drejtësi? Jo! Kjo është shkelje mbi gjakun e dëshmorëve dhe fyerje për të mbijetuarit!”, shprehet Ferizi.
Për fund, Ferizi kërkon që menjëherë të ndalet ndihma shtetërore për të akuzuarit e Speciales.
Sipas tij, shteti duhet të jetë në anën e viktimave, jo e avokatëve të krimit.
“Kërkesat e mia publike: Të ndalet menjëherë financimi i avokatëve të shtrenjtë për të akuzuarit që janë milionerë dhe nuk përfaqësojnë as idealin dhe as pastërtinë e luftës. Të konfiskohet pasuria e tyre e pajustifikueshme dhe të rikthehet në shërbim të invalidëve, dëshmorëve dhe familjeve të tyre. Të ndërtohet një sistem i drejtë për kujdes dhe respekt ndaj atyre që vërtet sakrifikuan – e jo ndaj atyre që e përdhosën luftën për interesa personale. Kosova nuk mund të ndërtohet mbi mashtrim dhe harresë. Shteti duhet të jetë në anën e viktimave, jo e avokatëve të krimit. Lufta ishte për çlirim, jo për plaçkë. Liria ishte për të gjithë, jo për disa. Drejtësia është për të vërtetën, jo për të pasurit”, përfundon Osman Ferizi për “Bota sot”.
/bota sot/
Discussion about this post