Një tjetër talent i ri shqiptar po tërheq vëmendjen me paraqitjet e tij në portë. Bëhet fjalë për Lekë Rexhepin, një djelosh nga Gjilani, i cili me përkushtim, disiplinë dhe dashuri për futbollin po dëshmon se e ardhmja mund t’i takojë atij.
Lekë Rexhepi ka lindur më 03.09.2015 në Prishtinë. Ai është djali i Fisnik Rexhepit dhe Gentiana Rrustemit, ndërsa jeton në Prishtinë ku vijon mësimet në klasën e pestë në “Prishtina High School”. Krahas rezultateve shumë të mira në shkollë, Leka po spikat edhe si portier i talentuar i KF “Ramiz Sadiku”.
Talenti i tij nuk ka kaluar pa u vërejtur as jashtë Kosovës. Pas pjesëmarrjes në një turnir ndërkombëtar në Nürnberg të Gjermanisë, ai është ftuar sërish nga trajneri me prejardhje nga Gjilani, Ndriçim Halili – Rici, për të mbrojtur portën e ekipit “TraintoWin” në një turnir të zhvilluar në Düsseldorf.
Sipas nënës së tij, Gentiana, e cila gjithmonë i qëndron pranë në stërvitje, ndeshje dhe udhëtime, Leka jeton me futbollin çdo ditë dhe punon me seriozitet të madh për ëndrrën e tij sportive.
Ajo që e bën edhe më të veçantë këtë talent të ri është fakti se ai ka fituar dy herë radhazi “Dorëzën e Artë” në turnire të organizuara në Kosovë – një dëshmi e qartë e potencialit dhe refleksit të tij në portë.
Pesë vite punë intensive, sakrificë dhe dashuri për sportin po shpërblehen me eksperienca të rëndësishme ndërkombëtare dhe me besimin e trajnerëve që shohin tek ai një portier me të ardhme.
DardaniaPress i uron Lekë Rexhepit shumë suksese në rrugëtimin e tij sportiv, me shpresën që një ditë emri i tij të dëgjohet edhe në arenat më të mëdha të futbollit.
Ismet Azizi
Discussion about this post