Deputeti shqiptar, Shaip Kamberi, ka reaguar pasi presidenti i Serbisë, Aleksandar Vuçiq, i është përgjigjur dje atij, duke provuar ta diskreditojë Kamberin, duke thënë se është me dekada në pushtet në Bujanoc, e më pas ka thënë se është gëzuar që ka arritur sukses politik me një fjalim.
Kamberi sot përmes një postimi në Facebook tha se presidenti i Serbisë, Aleksandar Vuçiq në vend se ta shantazhojë atë me metafora të arrestimeve, sipas tij, më mirë do të ishte t’i përgjigjet nevojave të shumta të qytetarëve në Serbi që varen nga vendimet e tij.
Postimi i plotë i Kamberit pa ndërhyrje:
Në vend se të më shantazhoi me metafora të arrestimeve, më mirë do të ishte që Presidenti Vuçiq t’i përgjigjet nevojave të shumta të qytetarëve në Serbi që varen nga vendimet e tij.
Si i gjithëpushtetshëm, ka mjaft mundësi për t’i realizuar premtimet e tij për një Serbi demokratike dhe të zhvilluar ekonomikisht
Se sa është demokratike Serbia e pushtetit të sotëm, mjafton ta shikosh përbërjen e parlamentit. Meqë Kosova qenka e tillë siç e përshkruajnë, pse atëherë Presidenti Vuçiq dhe Ana Bërnabiq trumbetojnë me vite se po e ndërtojnë pajtimin dhe paqen me Kosovën?
Politika e (keq)pëdorimit të serbëve të Kosovës për interesat e pushtetit në Beograd nuk i ka sjellur historikisht asnjë dobi serbëve në Kosovë. Nga jeta luksoze e Beogradit, lehtë është me luajtur patriotin serbomadh dhe me manipuluar me emocionet e serbëve të Kosovës, të cilët bashkëjetojnë me shqiptarët jo gjithherë në kushte të lehta reciproke.
Sa I përket negacionit të Reçakut asgjë e re. Pjesë përbërëse e kësaj politike negacioniste dhe e mohimit të krimeve të luftës, e cila nuk i sjell asgjë të mirë rajonit, e aq më pak Serbisë.
Ky mohim dhe negacionizëm nuk i shërben pozitivisht para së gjithash serbëve të cilët jetojnë në Kosovë. Por, natyrisht se Presidenti Vuçiq e ka hallin te imazhi dhe pushteti i tij në Beograd, jo te interesat e serbëve që jetojnë në Ranillug, Shterpcë apo Leposaviq.
Discussion about this post