Kryeministri Kurti ka thënë se e sheh të arsyeshme praninë e Policisë në veri përderisa ka banda rrugëve. Ai ka thënë se do t’i mirëkuptonte po që se protestat do të ishin në kërkim të zgjedhjeve të reja.
Duke folur për çështjen e Asociacionit, Kurti ka thënë se aty ka formulime të çuditshme, duke përmendur pikën për “komandantë serbë në Policinë e Kosovës”. Sipas tij, kjo s’duhet të jetë obligative sepse “s’duhet të ketë diskriminim ndaj etnive të tjera”.
Kurti ka komentuar edhe rekomandimet që kryetarët e rinj në veri të mos i ushtrojnë detyrat në objekte komunale. “Po t’i urdhëroja kështu, do të ishte sikur po nxis krijimin e strukturave paralele për struktura paralele. Pra të kopjoj metodat e tyre. Do t’u bashkohesha ilegalitetit të tyre. S’mund ta bëj këtë. Demokracia është që ligji të jetë mbi politikën”, ka thënë Kurti.
Ai ka thënë se ndërkombëtarët kanë pranuar procesin e zgjedhjeve dhe rezultatin e tyre, por edhe betimin, por është shprehur i habitur me deklarimin që të kundërshtohet futja e tyre në objekte komunale.
“Komuniteti ndërkombëtar me konsensus të gjerë pranoi procesin dhe rezultatet e zgjedhjeve. I pranuan betimet. E si tash i vini në pikëpyetje ata kur duan të futen në objektet komunale publike. Po të më thoshin mos bëni zgjedhje apo se ky rezultat nuk është i mirë, apo se keni rezultat e mos bëni betim, do të flisnim politikë, por tash politikisht po bëj atë që mundem nga mungesa e fuqisë”, ka thënë Kurti duke deklaruar se “tash kam më pak fuqi se që kam pasur para disa muajsh”.
“Jam i shqetësuar gjatë gjithë kohës, por kurrë i frikësuar”, ka thënë ai.
koha net
Discussion about this post