Kjo është njohja e parë për qeverinë Kurti, dhe e para pas marrëveshjes së Uashingtonit që e obligonte Kosovën, të ngrinte lobimin për njohje.

Siç merr vesh gazeta “Bota sot”, nga Ministria e Jashtme, pas thyerjes së akullit të njohjeve, priten edhe njohje të reja nga vendet që nuk e kanë njohur ende.

Më të rëndësihmet janë, pesë vendet e BE-së, Greqia, Sllovakia, Spanja, Rumania dhe Qiproja, përveç kësaj të fundit të tjerat janë edhe anëtare të NATO-s, njohja e të cilave e lehtësonë përshpejtimin e anëtarësimit të Kosovës në NATO.

Njohja nga Timori Lindor, që është një nga shtetet më të reja në botë, është njohja e 118 zyrtare e Kosovës shtet i pavarur dhe sovran.

Në komunikatën e përbashkët thuhet se Marrëdhëniet Diplomatike arrihen me qëllim të forcimit të bashkëpunimit mes dy vendeve në fusha të ndryshme, si në atë politike, ekonomike, tregtare, kulturore dhe në fusha të tjera me interes të përbashkët, sipas parimeve të Kartës së OKB-së dhe normave të së Drejtës Ndërkombëtare, njofton Ministria e Jashtme e Republikës së Kosovës, në faqen e saj zyrtare.

Po ashtu, në të thuhet se vendosja e Marrëdhënieve Diplomatike përkon me interesin e të dy shteteve për forcimin e mëtejmë të paqes dhe sigurisë ndërkombëtare.
Me nënshkrimin e marrëdhënieve diplomatike në mes të dy vendeve, Republika e Kosovës vazhdon forcimin e subjektivitetit të saj ndërkombëtar.

“Në këtë kohë të sfidave globale dhe agresionit me të cilin po perballet bota demokratike, forcimi i pozitës sonë diplomatike anekënd botës është i një rëndësie të veçantë, prandaj Republika e Kosovës do të vazhdojë angazhimin e saj për të vendosur marrëdhënie diplomatike edhe me vende të tjera njohëse, për të forcuar marrëdhëniet bilaterale me interes të përbashkët”, thuhet në njoftimin e Ministrië së Punëve të Jashtme.