Blinken në Takimin e Ministrave të Jashtëm të NATO-s: S’duam konflikt, por jemi gati nëse ai vjen

Ministrat e Jashtëm të NATO-s u takuan të premten në një takim të jashtëzakonshëm në shtabin e NATO-s në Bruksel, kryeqytet i Belgjikës, për të diskutuar rreth luftës Rusi-Ukrainë.

Në këtë takim pritet të diskutohet mbi planet aktuale afatgjata të NATO-s në Evropën Lindore dhe Evropën Qendrore pas sulmit të Rusisë ndaj Ukrainës.

Duke folur para kamerave me sekretarin e përgjithshëm të NATO-s, Jens Stoltenberg, përpara takimit, sekretari amerikan i Shtetit, Antony (Tony) Blinken, tha se Aleanca demonstroi një unitet shumë të shpejtë pas ofensivës ruse në territoret ukrainase.

Ai njoftoi se po hartojnë plane për të forcuar sigurinë e NATO-s.

“NATO-ja është një aleancë mbrojtëse. Ne s’duam konflikt, por jemi gati për konflikt nëse ai vjen tek ne. Ne do të mbrojmë çdo centimetër katror të territorit të NATO-s”, theksoi kreu i diplomacisë amerikane.

“Jemi duke bërë përgatitje për të ardhmen e NATO-s dhe ngjarjet e javëve të fundit janë sinjale për të ardhmen e Aleancës”, shtoi ai.

Tony Blinken vuri në pah se NATO-ja do të vazhdojë të demonstrojë unitet në javët e ardhshme.

Jens Stoltenberg deklaroi gjithashtu se në takimin e sotëm “ata do të diskutojnë përgjigjen ndaj pushtimit rus të Ukrainës”.

Pasi nënvizoi se do të trajtojnë edhe pasojat afatgjata të kësaj, shefi i NATO-s tha se të enjten mbrëma kanë parë raportimet për sulmin e Rusisë ndaj një termocentrali bërthamor në Ukrainë.

“Kjo tregon se lufta duhet të përfundojë dhe se Rusia duhet të tërheqë të gjitha trupat e saj e të angazhohet në përpjekjet diplomatike”, vijoi ai.

“NATO-ja është një aleancë mbrojtëse. Ne s’duam luftë me Rusinë”, rikonfirmoi Stoltenberg – sikurse dhe shefi i diplomacisë së Shteteve të Bashkuara të Amerikës – teksa nënvizoi se nuk duan të keqkuptohen për angazhimet e tyre lidhur me ruajtjen dhe mbrojtjen e të gjithë aleatëve.

Të ftuar në takimin e sotëm janë gjithashtu ministrat e jashtëm të Suedisë dhe Finlandës, vende joanëtare të NATO-s, si dhe përfaqësuesi i lartë i Bashkimit Evropian për Punët e Jashtme dhe Politikat e Sigurisë, Josep Borrell.

Në këtë takim të jashtëzakonshëm të kryediplomatëve të NATO-s, Turqia përfaqësohet nga ministri i Punëve të Jashtme, Mevlut Çavusoglu.

Ushtarët rusë filluan një ofensivë në Ukrainë më 24 shkurt.