Janë atletët e rinj të Kosovës që të shtunën u paraqitën në Kampionatin Ballkanik U20 në palestër. Garës nuk i është kushtuar ndonjë publicitet, ndërsa udhëtimi i delegacionit kosovar për në Beograd është bërë në heshtje të plotë. Por, atletët megjithatë kanë garuar në njërën prej palestrave të kryeqendrës së Serbisë, ndërsa në bazë të fotografive të ofruara, ata në gjoks kanë pasur të shkruar shkurtesën KOS.
Deri më tani sportistët e Kosovës nuk janë lejuar të garojnë në ngjarjet ndërkombëtare të mbajtura në Serbi. Por pas diskriminimit ndaj boksierëve të Kosovës, Komiteti Olimpik Ndërkombëtar (IOC) lëshoi një kërcënim ndaj Serbisë. Në fakt, IOC-ja kërcënoi Serbinë dhe vendet e tjera me qëndrim diskriminues ndaj sportistëve nga vende të caktuara, se nuk do të lejojë zhvillimin e ngjarjeve ndërkombëtare në ato vende. Kërcënimi me gjasë ka kryer punë dhe të shtunën u kalua barriera e madhe.
Ballkaniku U20 ishte një lloj testimi për pjesëmarrjen e Kosovës në Botërorin e atletikës në palestër, që mbahet muajin e ardhshëm po në Beograd. Synimet janë që Kosova të marrë pjesë në atë ngjarje të madhe të “mbretëreshës së sporteve”.
Ka pasur çështje lidhur me prezantimin e Kosovës në Ballkanikun U20 në palestër. Të premten në listën zyrtare të garuesve, atletët e Kosovës ishin paraqitur me shkurtesën FAK, pra të Federatës së Atletikës së Kosovës. Ndërkohë, atletët e vendeve të tjera ishin paraqitur me shkurtesën e vendit të tyre. Ka pasur një reagim nga Federata e Atletikës së Kosovës, ndërsa pyetje në drejtim të Federatës Ballkanike ka dërguar edhe KOHA. Federata Ballkanike në mbrëmje u përgjigj për KOHËN se bëhet fjalë për një “gabim të këshillit organizativ lokal dhe se gabimi do të përmirësohet”. Pak minuta pas përgjigjes, shkurtesa FAK u zëvendësua me atë të shtetit të Kosovës, KOS.
Drejtuesit e atletikës kosovare nuk kanë qenë të bindur se do të lejohen të garojnë, bazuar në përvojat e kaluara të sportistëve kosovarë. Ishte Sara Susuri që garoi e para e pas saj edhe pesë atletë të tjerë kosovarë.
Edhe gjatë garës, drejtuesit e atletikës kosovare kanë hezituar të japin shumë informata. Ndërkohë pas garës, pasi ekipi është vendosur në hotel, kryetari i FAK-ut, Halil Sylejmani, ka dhënë më shumë informata.
“Kam bërë një punë me një qetësi dhe strategji tash e një kohë. I kemi përfshirë eksponentët e tjerë të Federatës Ballkanike, të Evropës dhe të botës. Janë thyer tabutë. Është kjo një vizë edhe për sportet e tjera, që të bëhen edhe sportet e tjera pjesë e garave të përbashkëta. Ne e kemi fqinj Serbinë dhe duhet që edhe këta, edhe ne të jemi në gara të përbashkëta që i kemi me federatat e tjera. Këtu kemi qenë 20 federata”, ka thënë Sylejmani për KOHËN, në mbrëmjen e së shtunës.
Ai ka treguar se Kosova ka pasur trajtim të barabartë. Nuk ka pasur flamur për asnjë federatë, as për Serbinë, sipas Sylejmanit.
Nuk ka pasur telashe të sigurisë për ekipin e Kosovës. Nga kufiri në Merdar delegacioni kosovar është përcjellë nga Policia serbe, ndërsa siguria ka qenë në nivel edhe gjatë qëndrimit në Beograd.
Tani fokusi është te Botërori që mbahet në fund të marsit.
“Rruga është e hapur. Sipas sjelljeve të sotme nuk besoj se do të ketë asnjë problem”, ka shtuar Halil Sylejmani, kryetar i Federatës së Atletikës së Kosovës.
Ai ishte në krye të delegacionit që përfshinte edhe tre trajnerë e gjashtë sportistë.
Sa i takon garës, rangimi i atletëve ishte ai që pritej – larg zonës së medaljeve.
Sara Susuri në 60 metra ishte e 12-ta prej 14 garueseve. Florentina Reselica ishte e fundit (10) në 400 metra vrapim. E fundit (9) ishte edhe Ejona Shala në 1500 metra. Në 400 metra vrapim garuan Enis Bytyçi e Granit Ahmeti. Bytyçi u rendit i nënti e Ahmeti i 11-ti. Ishte i fundit prej atyre që përfunduan garën. Një maqedonas ishte në mes të dy atletëve kosovarë, ndërsa një serb nuk startoi fare.
Në 800 metra vrapim, Olti Bytyqi u rendit i shtati prej tetë garuesve që arritën në finish. La pas një bullgar, ndërsa një rumun nuk e përfundoi garën.
Diskutim rreth këtij postimi