Në vend që të lartësohet Kandiq, Zogoviq, lartësohet Rankoviq, Popoviq..

Prof Dr. Nexhmedin Spahiu reagon ashpër kundër sjelljes së kryeministrit Rama në këtë kohë kur po ngritën pakënaqësitë e shqiptarëve, sidomos në Kosovë, kundër pjesëmarrjes së rokerit serb Bregoviq në festën e birrës në Korçë.

Në profilin e tij në facebok shkruan:

“Është një numër i konsiderueshëm i intelektualëve të lartë e artistëve të mëdhenj serbë (Dimitrije Tucoviq, Radovan Zogoviq, Bogdan Bogdanoviq, Miki Manojlloviq, Natasha Kandiq, Sonja Biserko, etj) që në përballjet shqiptaro-serbe, për shkaqe morale kanë qenë në anën e shqiptarëve. Është interesant se ata nuk i nderon Shqipëria (madje deri diku as Kosova). Më e rënda, Shqipëria zyrtare nderon serbët më të shquar në antishqiptarizëm (Aleksandar Rankoviq e Milladin Popoviq janë zyrtarisht heronj të kombit shqiptar, shkrimtari Ivo Andriq, që ka hartuar elaborat për shfarosjen e shqiptarëve, lartësohet nga kryeministri Rama në vizitën e tij zyrtare në Beograd, gruaja e kriminelit Arkan dëgjohet gjithandej Shqipërisë, etj).”