Shoqata “Kosova për Sanxhakun”, në mesin e shumë aktiviteteve kulturore dhe shkencore që ka nisur, organizuar dhe realizuar deri më tash, është krenare sidomos me organizimin e simpoziumit të parë të këtij lloji në Prishtinë, në vitin 2018, në Institutin Albanologjik, me temë “Lahutarët e Sanxhakut të Pazarit të Ri”, e që tash po botohet si përmbledhje e kumtesave të autorëve që i kanë dërguar punimet e tyre për botim: Lahutarët e Sanxhakut të Pazarit të Ri, kumtesa të simpoziumit shkencor, mbajtur më 8.9.2018, Prishtinë, organizuar nga shoqata “Kosova për Sanxhakun”, në bashkëpunim me Institutin Albanologjik, Prishtinë.
Projekti i hartuar për lahutarët e Sanxhakut, nga prof. Zymer Ujkan Neziri, është realizuar pa shumë vështirësi nga Këshilli Organizues. Kemi kontaktuar me epikologë dhe kemi dërguar ftesa në të gjitha qendrat tona studimore dhe universitare, nga Shkodra e deri në Vlorë, nga Tetova e Shkupi e deri në Prizren, duke i përfshirë këtu edhe dy qendrat tona të mëdha, Tiranën e Prishtinën. Ftesat janë dërguar edhe për studiuesit nga Sanxhaku i Pazarit të Ri, në Universitetin e Tuzllës, si dhe në Evropë: Austri, Itali, Poloni etj. Simpoziumi është përkrahur financiarisht nga Ministria për Kulturë, Rini dhe Sport.
Pas simpoziumit është formuar Redaksia për përgatitjen e kumtesave për shtyp dhe janë caktuar anëtarët e Redaksisë dhe recensuesit. Recensues: prof. dr. Rigels Halili, epikolog, Universiteti i Varshavës, Poloni; prof. as. dr. Albin Sadiku, etnomuzikolog, Instituti Albanologjik, Prishtinë. Redaksia: prof. dr. Zymer Ujkan Neziri, epikolog, Instituti Albanologjik, Prishtinë; prof. dr. Nicola Scaldaferri, etnomuzikolog, Universiteti i Milanos, Itali; prof. dr. Rexhep Doçi, gjuhëtar, Instituti Albanologjik, Prishtinë; prof. dr. Lush Culaj, historian, Instituti Albanologjik, Prishtinë; dr. sc. Harun Crnovrshanin, publicist, Pazari i Ri, Sanxhak; mr. sc. Ismet Azizi, gjeograf, Gjilan; mr. sc. phd (c) Fitim Veliu, filolog, lektor, Mitrovicë, si dhe asistent, Prizren. Në mënyrë të veçantë falënderojmë kryeredaktorin – prof. dr. Zymer Ujkan Neziri dhe sekretarin – mr. sc. Fitim Veliu, të cilët e kanë kryer punën me përkushtim dhe me profesionalizëm.
Edhe kuadri gjuhësor -teknik është caktuar, dy lektorë: Fazli Hajrizi dhe Muhedin Fjuljanin, dy përkthyes: Zymer U. Neziri dhe Faruk Ferataj; redaktori teknik i thyerjes teknike dhe i treguesve të emrave, si dhe punuesi i ballinës, Zeni Ballazhi, të cilët po ashtu i falënderojmë për punën me përkushtim.
Përgatitja për shtyp i ka pasur disa vështirësi me disa kumtues të vonuar, por edhe me mangësi të shumta në përgatitjen e kumtesave për shtyp, duke filluar nga shkurtorja e fjalët çelësa e deri te fusnotat, rezymeja dhe bibliografia, me hartimin e të cilave është marrë kryesisht prof. Neziri.
Për mjete financiare, për përgatitjen për shtyp të librit dhe të shtypjes së tij, nuk është hapur dera aq lehtë, por nga Gjermania, shoqata – kulturore shqiptare – gjermane “Sali Çekaj’’, Pfaffenhofen a.d. Ilm, Gjermani, premtoi pa hezitim dhe e realizoi premtimin e dhënë për financimin e përgatitjeve për shtyp të librit dhe të shtypjes së tij, ’’Lahutarët e Sanxhakut të Pazarit të Ri”, e me këtë rast i falënderojmë shumë përzemërsisht.
Pas sigurimit të mjeteve financiare, ka filluar puna intensive në këtë pranverë dhe në fillim të dhjetorit u përfundua edhe përgatitja për shtyp, sipas standardeve të larta dhe me hyrje në tri gjuhë, shqip, boshnjakisht dhe anglisht, si dhe secila kumtese ka shkurtore (abstrakt), fjalë çelësa, fusnota të plota, përfundime, rezyme në tri gjuhë, treguesin e emrave të njerëzve, treguesin e emrave të vendeve dhe bibliografinë. Botimi po kryhet me bashkëbotuesin, Institutin Albanologjik, me të cilin kemi bashkëpunuar edhe në mbajtjen e simpoziumit. Emri i këtij instituti e nderon shumë shoqatën ‘’Kosova për Sanxhakun’’ dhe këtë vepër, kushtuar lahutarëve të Sanxhakut të Pazarit të Ri, me kumtesa të simpoziumit shkencor, sepse ai është simbol i albanologjisë në Ballkan e në Evropë.
Ismet Azizi, kryetar i Shoqatës “Kosova për Sanxhakun”
Discussion about this post