Edhe volejbolli si sportet të tjera, përjetuan dhunë të paparë nga milicia e pushtuesit serb.
Megjithatë sportistët dhe sportistet dot nuk u ndalën, por punuan me përkushtim dhe i zhvilluan garat e Republikës së Kosovës.
Arijana Berisha i takon Gjeneratës së Republikës. Ajo ka qenë ndër volejbollistet më të mira të viteve të 90-ta.
Arijana luante në pozitën e pasueses dhe ishte shembull se si luftohet për ngjyrat e klubit juniore të Kamenicës dhe të Dritës nga Gjilani, si dhe për sportin në përgjithësi, në veçanti shtetin e Kosovës.
Përkundër kërcënimeve që i vinin nga regjimi serb, Arijana asnjëherë nuk u ndal por vazhdoi misionin e saj fuqishëm në sportin skofiar, duke dhënë maksimumin në garat e Republikës së Kosovës.
“Interesant ka qenë ajo kohë, duke i fshehë topat e volejbolli, ndërresat – veshjen në trup”, kujton Arijana atëkohë.
Ajo është krenare për sakrificën që ka bërë së bashku me mijëra sportistë të Kosovës, duke i rezistuar okupatorit serb.
“Falënderoj edhe babain tim, Rrustem Berisha, që gjithmonë ka qenë krah i fortë i imi, frymëzim dhe falë tij kam arritur shumë si sportiste dhe në karrierëln time”, tha Arijana.
Arijana nuk i harron edhe trajnerët, që mësoi shumë nga ta. “Unë i kisha veçuar edhe trajnerët Sevdai Thaçi, Hajrush Fazliu, Hafiz Gashi, Faruk Brestovci, Ismet Azizi etj. nga të cilët mësova shumë. Kanë punu shumë me ne, profesionalisht por edhe tamam si fëmijë të vet na kanë konsideruar”, tha ajo. Ish volejbollistja nuk e harron edhe gjeneratën e artë të saj të atyre viteve.
“Vërtet ka qenë kënaqësi kur dilnim nga salla dhe me ndërresa, ishte diçka e papërshkrueshme për ne, në rrethanat që jetonim si popull. Kënaqësi me pas bashkëpunim me lojtaret Makfire Brestovci, Feime Shala dhe Kadrije Tosumi, Ibadete, Keka, Lumnije Huruglica, Shemsije Aliu, Ganimete Gërbovci, Mimoza Shkodra, pastaj vashat nga Ferizaj Vildane Jashari, Afërdita Sadiku etj.”, thotë Arijana.
Arijana si gjithmonë ka pasur telashe me serbet, kujton edhe një moment para pavarësimit të sportit nga ai ish jugosllav dhe serb.
“Ndërsa kohën me serbet kur kemi luajtur, kemi pasur presione si shqiptare, sharje, pickime kur shkoja me pasua. Ndeshjet më të vështira ishin në Zubin Potok dhe Mitrovicë, e kam fjalën para se të pavarësohet sporti ynë. Asnjë shikues shqiptar në Zubin Potok, por të gjithë serbë”, – tregon Arijana për gazetën kombëtare “Bota sot”.
Duhet theksuar se Arijana karrierën e ka filluar në moshën 14-vjeçare në KV Kamenica, për të shtegtuar pastaj në Dritë. “Iu dëshiroj suksese KV Dritës femrat dhe KVF Arbërisë nga Kamenica. Suksese edhe në garat ndërkombëtare, sa herë që marrin pjesë. Rinia të merret me sport sepse sporti është ambasadori më i mirë i shtetit. Mendja e shëndosh në trup të shëndosh”, porositë Arijana gjeneratat e reja.
bota sot
Diskutim rreth këtij postimi