Partia e Drejtësisë dhe Pajtimit (SPP) në Mal të Zi ka reaguar ndaj deklaratës së miratuar në Komunën e Zetës, me të cilën simbolikisht vihet në dyshim njohja e shtetit të Kosovës, duke theksuar se komunat nuk kanë kompetencë të merren me çështje të politikës së jashtme.
Në reagimin e SPP-së thuhet se njohja apo mosnjohja e një shteti është çështje ekskluzive e politikës së jashtme dhe kompetencë vetëm e shtetit të Malit të Zi, e jo e komunave apo strukturave lokale politike.
Reagimi vjen pas deklaratës së kryetarit të Partisë Demokratike Popullore, Milan Knežević, i cili tha se Zeta “nga sot nuk e njeh shtetin e Kosovës”, deklaratë që nga SPP është cilësuar si precedent i rrezikshëm politik dhe institucional.
“Nëse tolerohet kjo praktikë, Mali i Zi hyn në një precedent të rrezikshëm, ku çdo komunë mund të vendosë në mënyrë të njëanshme për çështje që prekin sovranitetin, detyrimet ndërkombëtare dhe rendin kushtetues të shtetit”, thuhet në reagimin e SPP-së.
Pyetja që ngriti shqetësime serioze
Pjesa që ka tërhequr më së shumti vëmendje është paralajmërimi i drejtpërdrejtë i SPP-së për pasojat që mund të sjellë një praktikë e tillë.
“Shtrohet pyetja logjike dhe shqetësuese: a mund të ndodhë nesër, sipas së njëjtës logjikë, që ndonjë komunë në Sanxhak të shpallë se nuk e njeh Serbinë?”
Sipas SPP-së, kjo tregon se ligjet dhe parimet kushtetuese nuk mund të interpretohen në mënyrë selektive dhe sipas interesave politike të momentit.
Partia paralajmëron se heshtja e institucioneve shtetërore do të nënkuptonte miratim të heshtur të një praktike që mund të destabilizojë më tej ambientin politik dhe shoqëror në Mal të Zi.
“Komunat nuk mund të bëjnë politikë të jashtme”
SPP kërkon nga institucionet shtetërore të Malit të Zi që të reagojnë qartë dhe pa vonesë, duke bërë të ditur se komunat nuk kanë të drejtë të marrin vendime që lidhen me politikën e jashtme apo marrëdhëniet ndërkombëtare.
Sipas tyre, lejimi i deklaratave të tilla do të hapte rrugën për tensione të reja politike dhe ndarje të panevojshme në shoqëri.
Në fund të reagimit, SPP thekson se respektimi i Kushtetutës, ligjeve dhe kompetencave të përcaktuara qartë duhet të jetë mbi interesat ditore politike dhe mbi deklaratat simbolike që mund të kenë pasoja serioze për shtetin dhe marrëdhëniet ndëretnike.
“Vetëm një shtet që respekton institucionet dhe rendin juridik mund të ruajë stabilitetin, barazinë dhe sigurinë për të gjithë qytetarët e tij”, thuhet në përfundim të reagimit.
Burimi: Radio Petnjica
Discussion about this post