Zhvillimet politike dhe ekonomike që ditët e fundit po vijnë nga Shtetet e Bashkuara të Amerikës po e tronditin gjithnjë e më fort pushtetin në Beograd. Në qarqet politike të Serbisë, por edhe më gjerë në rajon, po shtrohet gjithnjë e më shpesh pyetja nëse në Washington po ndodh një ndryshim serioz i qasjes ndaj regjimit të Aleksandër Vuçiçit, shkruan portali ekskluzivne.online
Një shtysë shtesë për këto spekulime është miratimi i fundit i Ligjit për Demokracinë dhe Prosperitetin e Ballkanit Perëndimor në Dhomën e Përfaqësuesve të Kongresit amerikan. Ky dokument identifikon qartë kërcënimet kryesore për stabilitetin e rajonit, ku veçohen korrupsioni i përhapur, rrënimi i institucioneve demokratike dhe cenimi i integritetit zgjedhor.
Bashkëpunëtori i lartë shkencor i Institutit për Filozofi dhe Teori Shoqërore, Dejan Bursaç, vlerëson se ky zhvillim duhet të shkaktojë shqetësim serioz në majat e pushtetit serb. Duke komentuar vargun e mesazheve negative që vijnë nga SHBA-ja, Bursaç theksoi se, po të ishte në vendin e presidentit të Serbisë, do të pyeste veten se kush në të vërtetë po punon për interesat e tij në Washington.
“Sanksionet ndaj NIS-it, dështimi i projektit Trump Tower, tërheqja e Jared Kushnerit, sanksionet ndaj Linglong-ut dhe tani ligji që synon drejtpërdrejt korrupsionin dhe jodemokracinë në Serbi – po të isha Vuçiç, do të mendoja se ambasada ime në Washington po më punon kundër”, deklaroi Dejan Bursaç.
Vëmendje të veçantë në opinionin e brendshëm po tërheq fakti se në krye të Ambasadës së Serbisë në Shtetet e Bashkuara ndodhet Dragan Shutanovac, ish-kryetar i Partisë Demokratike, gjë që ushqen më tej spekulimet për tensione të brendshme politike dhe përplasje interesash.
Ndërkohë, një goditje shtesë për pushtetin në Beograd erdhi nga vendimi i Jared Kushnerit, dhëndrit të presidentit amerikan Donald Trump, për t’u tërhequr nga projekti që kishte të bënte me kompleksin e Shtabit të Përgjithshëm në Beograd. Tërheqja pasoi pas publikimit të dyshimeve serioze për korrupsion dhe për heqjen e paligjshme të statusit të trashëgimisë kulturore nga ky objekt.
Në të njëjtën kohë, Shërbimi Doganor dhe Kufitar i SHBA-së mori vendim për ndalimin e dërgesave të gomave të automobilëve që prodhohen në Serbi nga kompania Linglong, për shkak të dyshimeve se në procesin e prodhimit është përdorur punë e detyruar.
Ligji i miratuar së fundmi në Kongresin amerikan shkon edhe më tej, duke parashikuar mundësinë e vendosjes së sanksioneve ndaj individëve të përfshirë në aktivitete korruptive në Ballkanin Perëndimor. Serbia është i vetmi shtet që përmendet drejtpërdrejt në vetë dokumentin.
Në gjetjet e Kongresit problematizohen veçanërisht zgjedhjet parlamentare dhe lokale të mbajtura në Serbi në dhjetor të vitit 2023, të cilat janë vlerësuar se kanë shkaktuar “shqetësim të thellë për gjendjen e demokracisë”.
Të gjitha këto sinjale dhe veprime nga Washingtoni hapin një pyetje thelbësore: a po zhvillohet pas dyerve të mbyllura një rikonfigurim politik që mund të tronditë seriozisht pushtetin aktual në Beograd? Nëse ky trend vazhdon, Serbia mund të përballet jo vetëm me izolim politik dhe sanksione të reja, por edhe me një rishikim të thellë të rolit të saj në rajon dhe në arenën ndërkombëtare, në një moment vendimtar për të ardhmen e Ballkanit Perëndimor.
Discussion about this post