Si shqiptar, më vjen keq kur shoh polarizimet dhe përplasjet mes grupeve të caktuara fetare, të cilat debatojnë se kush është më patriot, kush është më afër Zotit apo kush është më shqiptar — ai me kryq, ai me yll e hënë apo ai protestant. Jemi në shekullin XXI dhe një ndarje e tillë nuk reflekton aspak vlerat e popullit tonë. Historia jonë ka qenë e dhimbshme dhe tragjike, e mbushur me konvertime të dhunshme, asimilim dhe përpjekje për të na zhdukur identitetin kombëtar.
Perandoria Osmane e ndaloi gjuhën shqipe për pesë shekuj, duke u përpjekur të zhbënte kulturën dhe identitetin tonë kombëtar. Serbia dhe pushtues të tjerë, në periudha të ndryshme historike, kanë okupuar trojet shqiptare, kanë vrarë, shpërngulur dhe kanë synuar ta zhdukin qenien shqiptare. Megjithatë, pavarësisht nga dhimbja dhe sakrificat, shqiptarët kanë mbetur gjithmonë të bashkuar rreth gjuhës, atdheut,flamurit,kulturës dhe gjakut të tyre.
Feja te shqiptarët ka qenë gjithmonë çështje shpirtërore dhe personale, pa u bërë pengesë për bashkëjetesën mes vëllezërve të një gjaku. Gjergj Kastrioti Skënderbeu, heroi ynë kombëtar, i bashkoi shqiptarët përtej dallimeve fetare për të mbrojtur trojet nga pushtuesit. Në kohë të vështira, kemi dëshmuar se mbi gjithçka jemi shqiptarë, dhe kjo është forca jonë më e madhe.
Prandaj, unë deklaroj me krenari se mbi çdo përkatësi tjetër ndihem shqiptar dhe një besimtar i të Madhit Zot që ka krijuar njerëzimin. Le të vazhdojë të na bashkojë harmonia,dashuria për atdheun dhe respekti për njëri-tjetrin, ashtu siç na ka bashkuar gjithmonë historia dhe gjaku ynë i përbashkët, ta duam veten, familjen, Kombin më vepra e jo më fjalë.
Lumturia është nji rrugëtim, jo nji destinacion.
Shën Tereza- Gonxhe Bojaxhiu.
Osman Ferizi
23.03.2025.
PS. Shtatorja e Shën Terezës në Pfaffenhofen( Bajern), e sollëm këtu si komunitet përmës Shoqatës kulturore “ SALI ÇEKAJ”, në vlerësim dhe krenari të veprës së madhe për njerëzimin dhe kombin!
Discussion about this post